وإحنا بإيدينا نعيش بمزاجنا أحلى كتير

الأربعاء، ٢١ مايو، ٢٠٢٥ — ٧:٤٥ ص

من زمان جداً وأنا بحب الأغاني كنوع من حبي للفن بشكل عام وللفكر والتأمل بشكل خاص، وكنت بلاقي فيها كلمات تفهمني الحياة وأقدر من خلالها أتعرف على تجارب معملتهاش ومش هقدر أعملها او مش عايز أعملها.

لكن من ساعة ما ألتزمت دينياً في ٢٠٠٩ وأنا مبسمعش موسيقى الحمد لله، بس من كام سنة جت لي فكرة أني أجمع Acapellas للأغاني اللي بحبها وأسمعها براحتي، ودي بتكون نسخ من الأغاني لكن بدون موسيقى، وفعلاً بدأت أعمل كدة.

المشكلة كانت أني مبلقيش كل الأغاني اللي بحبها Acapella، فكانت الأختيارات محدودة جداً، زائد أن جودة الصوت كانت بتبقى سيئة جداً ومنغمشة، لكن من كام يوم جه في بالي أستخدم الAI (الذكاء الأصطناعي) في أني أفصل الموسيقى عن صوت المغني في الأغاني اللي بحبها، وبالتالي أقدر أسمعها براحتي. مع التقدم اللي حصل في الAI تقنيات فصل صوت المغني عن الموسيقى بقت دقيقة وسهلة وسريعة جداً، وممكن في أقل من دقيقة أفصل الموسيقى عن أي أغنية، اسمها بالأنجليزي: Vocal extraction from music.

النهاردة وأنا ببحث في الموضوع دا جت قدامي في YouTube playlist حاطت فيها الأغاني العربي اللي بحب كلماتها أغنية إليسا وشركة WE: “قبل أي حد”، وهيا أغنية بعض كلماتها – مش كل كلماتها – هادفة جداً، ففكرت أكتب لكم خاطرة جتلي منها في المذكرات بتاعتي النهاردة.

الأغنية بتقول:

ما قبل أي حد تاني

ليه نستنى لو لثواني

وإحنا بإيدينا نعيش

بمزاجنا أحلى كتير

ربنا سبحانه وتعالى وعد كل الخلق وعد حق عليه، لأن وعد الله كان مسؤلاً، قال:

مَنْ عَمِلَ صَالِحًا مِّن ذَكَرٍ أَوْ أُنثَىٰ وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً ۖ وَلَنَجْزِيَنَّهُمْ أَجْرَهُم بِأَحْسَنِ مَا كَانُوا يَعْمَلُونَ

— سورة النحل/٩٧

في حين أن الله تعالى توعد المعرضين عن ذكره والرافضين الإيمان بالمعيشة الصعبة جداً في الحياة الدنيا؛ قال تعالى:

وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَىٰ

— سورة طه/١٢٤

عايز أوضح أن أنا مش بتكلم عن الآخرة والجنة وعذاب النار دلوقتي، لأ، أنا بتكلم عن الحياة الحالية اللي عايشينها بين إيدينا دلوقتي، الحياة دي بإدينا وبمزاجنا نقدر نحولها نخليها حياة طيبة، ودا بمجرد ما نؤمن ونبدأ نعمل صالحاً.

وهنا كانت خاطرتي عن كلمات أغنية إليسا وWE:

ما قبل أي حد تاني

ليه نستنى لو لثواني

وإحنا بإيدينا نعيش

بمزاجنا أحلى كتير

ربنا يهدينا ويسدّدنا، ولو في حد من اللي بيتابعونا بيسمع أغاني وعايز يعرف طريقة العزل صوت المغني عن الموسيقى يبعتلي وهشرحله بالتفصيل، والموضوع بسيط جداً وسهل لكن يعتبر توبة منك وبداية للحياة الطيبة، وربنا سبحانه وتعالى يحب التوابين.