الأربعاء، ٣٠ يناير، ٢٠١٩ – الساعة ١١:٠٠ صباحاً

طريق شرم الشيخ – الكيلو ~ ٢٥٠

جت الساعة ١١ صباحاً فركنّا على جنب نأكل حاجة ونريح من السواقة شوية. أتمشيت أتأمل منظر الجبال الرائع مع الهواء الطلق، بينما أختي ومرات أخويا كانوا بيحضروا السندوتشات.

خلصنا أكل وركبنا العربيات. ركبت في الكرسي اللي جنب السواق وركب بابا في كرسي السواق عشان يكمل باقي الطريق، وانطلقنا. ووأنا راكب جنب بابا اتصلت على الresort أأكد الحجز..

موظف الاستقبال: Hello, Jaz Belvedere Resort. 

May I help you?

أنا: السلام عليكم

موظف الاستقبال: وعليكم السلام

أنا: لو سمحت، كنا حاجزين ٤ أيام و٣ ليالي بداية من النهاردة الأربعاء، أنا حاجز عن طريق شركة TravelYalla، ممكن أأكد الحجز؟

موظف الاستقبال: أكيد يا أفندم، الحجز بأسم مين؟

أنا: عمرو علي إبراهيم

موظف الاستقبال: تمام يا أفندم، الحجز مظبوط ٦ أفراد وطفل، ٤ أيام ٣ ليالي

أنا: تمام، ممتاز، شكراً لوقتك

موظف الاستقبال: شكراً ليك يا أفندم، منتظرينكم

أنا: شكراً، مع السلامة

موظف الاستقبال: مع السلامة

قفلت المكالمة وبصيت على الفيسبوك بتاعي لقيت كتير من صحابي عاملينلي like على بيت الشعر بتاع الإمام الشافعي اللي نشرته الصبح. أتبسط. قفلت الموبايل وقعدت أتفرج على سلاسل جبال البحر الأحمر على يميني..فتحت كاميرا الموبايل وبدأت أصورها وإحنا ماشيين بالعربية، متذكراً بقية أبيات قصيدة الإمام الشافعي رحمه الله في مدح السفر:

سافر تجد عوضاً عمَّن تفارقهُ *** وَانْصِبْ فَإنَّ لَذِيذَ الْعَيْشِ فِي النَّصَبِ

إني رأيتُ وقوفَ الماء يفسدهُ *** إِنْ سَال طَابَ وَإنْ لَمْ يَجْرِ لَمْ يَطِبِ

والأسدُ لولا فراقُ الأرض ما افترست *** والسَّهمُ لولا فراقُ القوسِ لم يصب

والشمس لو وقفت في الفلكِ دائمة *** لَمَلَّهَا النَّاسُ مِنْ عُجْمٍ وَمِنَ عَرَبِ

والبدر لولا أفول منه ما نظرت *** إليه في كل حين عين مرتقب

والتَّبْرَ كالتُّرْبَ مُلْقَى في أَمَاكِنِه *** والعودُ في أرضه نوعً من الحطب

فإن تغرَّب هذا عزَّ مطلبهُ *** وإنْ تَغَرَّبَ ذَاكَ عَزَّ كالذَّهَبِِ