الجمعة ٢٦ أبريل، ٢٠١٣ – الساعة ١٢:٠٠

الطريق الصحراوي – الكيلو ١٠٠

وصلت عند لفة وادي النطرون، لفيت ودخلت طريق العالمين.

الطريق فاضي تماماً. الصحراء على يميني والقمر المكتمل الرائع قدامي فوق عالشمال، زي الأفلام بالضبط، فرصة رائعة للتأمل والتفكُر.

لاحظت أن الطريق متسفلت كويس جداً، مفيهوش نقر، وطبعاً مفيش مطبات، كدة أخيراً هقدر أثبت السرعة وأمشي براحتي مطمئن. بس برضه في مشكلة، أن مفيش معايا حد يساعدني لو حصلت لي مشكلة في العربية. “الخلوة” على طريق العلمين ليها ميزة وعيب؛ ميزتها أني لو عربيتي كفائة ومستوفية لمعايير الجودة الأوروبية يبقى ريحت نفسي من الإزعاج اللي ممكن تسببهولي العربيات التانية على طريق السفر، أما عيبها هو أن لو عربيتي فيها مشاكل يبقي أنا في خطر حقيقي لأني لو حصلي أي عطل هيبقى لواحدي على الطريق..

بدأت أتأمل الموضوع دا من نظرة إيمانية. لو أسقط فكرة “الخلوة في طريق العلمين” على “الخلوة في الطريق إلى الله”، هلاقي تشابه كبير.

أنا مثلاً في “الطريق إلى الله” بتيجي عليا فترات ألاقي نفسي في “خلوة مع الله”، بدون أي مؤثرات خارجية، لا سلبية ولا إيجابية، لا معايا صحبة صالحة ولا صحبة سوء، ساعتها الصراط المستقيم بيكون متسفلت وstraightforward زي طريق العلمين دلوقتي بالضبط، وساعتها بيبان مدى ثباتي على الدين بوضوح وبيبان إذا نفسي مستوفية ل”معايير الجودة الإيمانية”.

كذلك الثبات عالدين متشابه مع خاصية الESP – Electronic Stability Program اللي في عربيتي. تشابه كبير بين الESP وبين الثبات عالدين في وقت الفتن والابتلاءات. فزي ما سعات وإحنا عالطريق السريع ما بنلاقي حاجة في وسط الطريق تفاجأنا وتشتتنا وتخلينا نعمل حركة سريعة بالعربية عشان نتفاداها برضه وإحنا عالطريق لربنا بتدخل في حياتنا مؤثرات خارجية بشكل مفاجئ، هي الفتن والابتلاءات. وزي ما ممكن وأنا ماشي بالعربية أتفاجئ بعجلة كاوتش مرمية في الطريق او شبورة تنزل عليا، كذلك في الطريق إلى الله سعات بتفاجئ بأزمة مالية او مرض حد بحبه..

وعادة، الثبات على طريق اللي متسفلت كويس زي طريق العالمين بيكون سهل مع أغلب العربيات، كذلك الثبات على الدين في الأوقات اللي مفهاش فتن وإبتلاءات، بيكون سهل مع أغلب الناس. لكن المشكلة والصعوبة واللي بتفرّق بين واحد والتاني هو الثبات على الدين في الوقت اللي فيه فتن وابتلاءات، وبالتالي زي ما بنلاقي العربيات اللي فيها ESP ومستوفية لمعايير الأمان الأوروبية التحكم فيها سهل حتى وقت المفاجأت برضه بنلاقي الناس اللي عندها fitness في الإيمان عندها ثبات عالدين حتى وقت الفتن والإبتلاءات.

يمكن أنا دلوقتي في فترة فتن وإبتلاءات ومش قادر أسرع في طريقي لربنا، لكن باقي حوالي شهر على رمضان، وفي رمضان الشياطين بتتسلسل، وأبواب الجنة بتتفتح والرحمات بتنزل والفتن بتقل والناس كلها بتتحول لصحبة صالحة، عشان كدة قررت أسافر مارينا وهيا فاضية قبل مالصيف يبدأ، أصلي قيام ليل على الشاطئ وتكون وقفة مع النفس أستعد بيها لرمضان، عشان لما رمضان يجي أقدر أنطلق وأستفيد منه زي ما أنا ماشي عالسرعة القصوى على طريق العلمين المتسفلت.