Flashback – صيف ٢٠٠٨

‎مارينا، الشانزليزيه، الArcade Center‬‬‬

‎ياسمين: قطّعناكوا‬‬‬

‎كريم: يا بنتي أنا نص نتايجي strikes، دينا وسارة هما اللي خسروني‬‬‬

‎دينا: سارة أنتي طول الgame عمالة تلعبي في ضفرك اللي أتكسر‬‬‬

‎سارة: دي لعبة متخلفة أصلاً مش عارفة إيه اللي عاجبكوا فيها‬‬‬

‎ياسمين: loo-zers‬‬‬

‎مهاب: قال يعني أنتي عملتي حاجة، دانتي كنتي هتخسرينا‬‬‬

‎ياسمين: أنا؟! دانا أشطر واحدة فيكوا، صح يا عمرو؟‬‬‬

‎أبتسمت.. أسلوبها مضحك فعلاً‬، رغم أني متضايق جداً‬‬

من أسبوعين صحابي بتوع الكلية كانوا هنا في مارينا خارجين مع بنات وعايزيني أروح معاهم فرفضت ودخلت معاهم في نقاش طويل جداً عشان أقنعهم أن مينفعش يكون في أختلاط بين الولد والبنت غير في حدود الحاجة الملحة، وأستشهدت بالأدلة الشرعية والعقلية اللي أتعلمتها من كلام معز مسعود ومصطفى حسني عن حدود وضوابط العلاقة بين الولد والبنت، تقريباً كلهم أقتنعوا، الموضوع واضح جداً في الدين وأضراره واضحة جداً في المجتمع، لكن العجيب أننا بعد ما خلصنا نقاش سلموا عليا وبرضوا رحوا عالحفلة.. بعد ما مشيوا قعدت أفكر؛ إيه اللي يخلي حد يعمل حاجة عارف أنها غلط وليها أضرار؟ وإزاي هيتبسطوا وهما عارفين أنهم بيعصوا ربنا وبيساعدوا على فساد المجتمع؟‬ كنت متضايق جداً، لكن المثير للسخرية أن هما دلوقتي رجعوا القاهرة وأنا خارج ألعب bowling مع جروب ولاد وبنات تانية.. عملت زيهم وأنا اللي كنت من أسبوع بنتقدهم.. 

خرجنا من الArcade Center بأتجاه العربيات.

‎مهاب: علاء بيتصل. هو وإنجي عايزين يجولنا، هتعملوا إيه؟‬‬‬

‎ياسمين: I’m dehydrating، wanna drink something‬‬‬

‎كريم: عايزين نكمل بولة الestimation بتاعة إمبارح‬‬‬

‎ياسمين: مبحبش estimation، نلعب crazy 8..‬‬‬

‎دينا: مبتحبيش estimation عشان مبتحبيش تفكري‬‬‬

‎ياسمين: very funny‬‬

‎كريم: تروحوا Mamma Mia؟‬‬‬

‎مهاب: الساعة ١٠:٣٠، أي مكان هنروحه هنقف waiting list‬‬‬

‎وصلنا عند العربيات‬، ركبت العربية ووصلت الموبايل بالعربية وشغلت playlist الأغاني بتاعتي من YouTube وقعدت أسمع وأنا مستني صحابي اللي واقفين جنب العربية يركبوا. اشتغلت أغنية Danser sur la lune فبدأت أتأمل كلماتها:‬‬

Les murs sombres aux reflets gris‬‬‬

La ville sans nom bercée par l’ennui‬‬‬

Toi tu rêvais d’être ébloui‬‬‬

Si les étoiles te servent d’abri‬‬‬

فعلاً مارينا تبدو لي كمدينة مملة، خصوصاً أني عمال بلف في دواير مع التدين بقالي سنين.

‎كريم (من شباك العربية): عمرو، votes؛ تروح الفيلا عند مهاب ولا نروح café ونستنى الwaiting list؟‬‬‬

‎أنا: Pass

‎كريم: عمرو pass‬‬‬

‎ياسمين: okay, lets go‬‬‬

‎ركب معايا كريم وياسمين ودوّرت العربية‬.‬‬

‎أنا: أتفقتوا على إيه؟‬‬‬

‎كريم: هنروح لمهاب، بس خلينا نعدي على الsupermarket نشتري pepsi وchips‬‬

أنا: Ok

‎طلعت بالعربية ناحية الsea gull‬‬‬

Alors viens, oh oui viens‬‬‬

Prend ma main‬‬‬

Oublie tes pleurs, tes chagrins‬‬‬

Allez viens‬‬‬

Oh ce soir je t’emmène‬‬‬

Danser sur la lune‬‬‬

Flâner sur les dunes‬‬‬

‎ياسمين: عمرو الأغنية دي بتتكلم عن إيه؟‬‬‬

‎فكرت بيني وبين نفسي: الأغنية دي بتتكلم عن إيه..‬‬‬

‎العلماء اللي أتكلموا عن أن سماع الغناء والمعازف مسألة خلافية وأفتوا بأن الأستماع ليها جائز قالوا أن كلمات الأغنية وطبيعة الأداء هيا اللي بتحدد إذا كانت حلال ولا حرام، فحلالها حلال وحرامها حرام. ورغم أن الأغلبية العظمى من العلماء حرموا الأستماع للمعازف في غير الأعياد والمناسبات لكني كعادتي بنقي اللي بيعجبني من كلام العلماء بغض النظر عن إيه هو الحكم الفقهي الصحيح اللي فيه مصلحتي، مش بس كدة، وإنما كمان بنفذه غلط فبسمع أغنية فيها بنت بتغني بدلع عن أنها عايزة تهرب مع صاحبها يروحوا يرقصوا فوق القمر، فهل دا اللي الإمام إبن حزم والإمام الغزالي أباحوا سماعه؟ وهل دا اللي الإمام الشوكاني نقل الخلاف فيه؟ وهل دا “الفن الهادف” اللي معز مسعود قال أننا ممكن نسمعه لو هيبعدنا عن الفن المُضل؟ الحقيقة هي أني لسة زي مانا من زمان عارف الحق بس بضحك على نفسي.‬‬‬

‎وصلنا باسم ماركت اللي عند KFC. نزل صحابي يشتروا حجات وأستنيتهم في العربية أسمع الأغنية اللي مشغلها repeat بقالي يومين كmatching لمشاعري تجاه الملل اللي حاسس بيه في مارينا مع الfull moon بتاع منتصف الشهر العربي عشان أعيش معاني عاطفية تجاه بنت خيالية لأني مفيش بنت موجودة في حياتي.. إلا أن قلب الإنسان أتخلق وأقوى غريزة جواه هيا الحب، فلو محبش بيه الحجات اللي أتخلق عشان يحبها لازم هيلاقي نفسه بيحب أي حاجة عشان يملى فراغ قلبه، ودا اللي خلى ناس في الغرب تتجوز قطط وكلاب ومخدات..‬‬

‎خرج صحابي من الsupermarket وركبوا العربية وطلعت من بوابة ٢ على الطريق السريع ناحية بوابة ٥‬. ‬‬

وصلنا بوابة ٥ فدخلت من البوابة ومشيت علطول ناحية venice ودخلت بين الشاليهات لحد ما وصلنا فيلا مهاب في الصف الأول عالبحيرة.‬

‎ركنت ونزلنا. دخلنا لقينا باقي صحابنا قاعدين في الterrace مستنينا عشان نكمل بولة الestimation بتاعة إمبارح.‬‬‬

‎دخل مهاب جاب كوبايات وأطباق. فتحنا الpepsi والchips وحطيناهم في الأطباق والكوبايات وبدأنا لعب.‬‬‬

‎أختلف العلماء في حكم لعب الكوتشينة، بعضهم قال حرام وبعضهم قال مباح. مرة حد سأل معز مسعود في الlive chats بتاعته اللي كانت في رمضان اللي فات عن الموضوع دا فقال أنه واخد برأي شيخه اللي بيقول أن لعب الكوتشينة مباح ما دام لا تلهي عن الصلاة او بتسبب العداوة والبغضاء. وأنا الحقيقة من ساعتها قررت أخد بالرأي دا لأني بثق في معز مسعود، مع أن هو نفسه اللي قال أن العلاقة بين الولد والبنت تكون في حدود الحاجة الملحة ولا يجوز أنهم يخرجوا يتفسحوا مع بعض..‬ كعادتي باخد من الدين اللي عاجبني وبسيب اللي مش عاجبني..‬‬

‎سارة: عمرو عايزة أتكلم معاك، نزّل حد مكانك وتعالى نتمشى عالبحيرة‬‬‬

‎كريم: لا يا سارة أستني لما البولا تخلص‬‬‬

‎ياسمين: كفاية estimation بقى، يلا نلعب crazy 8‬‬‬

‎كريم: شريف وإنجي جايين أبقي ألعبي معاهم crazy 8‬‬‬

‎من أجمل كلام إبن القيم رحمه الله في كتاب الداء والدواء قوله “إن المعاصي تزرع أمثالها، ويولد بعضها بعضاً حتى يعز على العبد مفارقتها والخروج منها.”، كأنه بيتكلم عن الإدمان، لكن بفهم أوسع..‬‬‬

‎في دورة التعامل مع المدمنين اللي أخدتها في مركز Freedom House لعلاج الإدمان اتعرفت على مدمنين كتير، وكنت كل ما أتعرف على واحد أطلب منه يحكيلي عن أول مرة تعاطى فيها مخدرات. طبعاً كل واحد فيهم كان ليه قصة مختلفة لكن كل القصص كانت متشابهة في نقطة وهي أن كلهم اتعلموا شرب المخدرات من حد تاني كان بيشرب، شيء منطقي جداً..‬‬‬

‎عشان كدة من شروط الtwelve steps rehabilitation program اللي شغالين بيه هناك أن المدمن اللي بدأ برنامج العلاج لازم يبطّل يقابل صحابه اللي كان بيشرب معاهم قبل كدة لحد ما يعدي على تبطيله المخدرات سنة، بعدها بياخد شهادة معتمدة وبيبقى مؤهل يكون مُشرف مُعالج ويoutreach بنفسه لصحابه القدام ويتكلم معاهم براحته، يناقشهم بالعلم والخبرة اللي أكتسبهم خلال فترة العلاج عشان يفوقهم من غفلتهم ويقنعهم أنهم في مشكلة ولازم يبدؤوا يتعالجوا.‬‬‬

‎مهاب: علاء بيسأل حد عايز حاجة من mac‬؟‬‬

‎كريم: خليه يجيبلي McRoyal supersize combo‬‬‬

‎دينا: McFlurry strawberry topping‬‬‬

‎ياسمين: Junk food‬..‬‬

‎ومع بداية برنامج العلاج كل مدمن بيختار مُشرف، مدمن متعافي يكون الguide بتاعه خلال سنة العلاج. المشرف بيعرّف المدمن ببرنامج العلاج وبيleadـه خلاله خطوة بخطوة، وبيتابعه ويساعده في في حل المشاكل النفسية والأجتماعية والإيمانية اللي بيواجهها من خلال جلستين حوار يومياً.‬‬‬

vibration في جيبي.. طلعت الموبايل، message من صاحبي السلفي:‬‬‬

‎”قال صلى الله عليه وسلم: طوبى لمن وجد في صحيفته أستغفاراً كثيراً.”‬‬‬

‎من ساعتين صاحبي السلفي أتصل بيا قالي أن الليلة هيا ليلة النصف من شعبان وأن في شعبان بتترفع صحيفة أعمال السنة الماضية لربنا وتبدأ صحيفة جديدة بيسجل فيها الملائكة أعمالنا لحد شعبان السنة الجاية. وقالي أن خلاص فاضل أسبوعين ويخلص شهر شعبان ويبدأ رمضان وتبدأ سنة جديدة في صحيفة أعمالنا، ونصحني أجتهد في الاستغفار والدعاء وقيام الليل الأسبوعين اللي فاضلين دول لقول النبي صلى الله عليه وسلم: “إنما الأعمال بالخواتيم.”‬‬‬

‎ورغم أن أتصال صاحبي السلفي وأنا مع صحابي البنات في الbowling صدمني وأضطريت أبعد عنهم قبل ما أرد عشان ميسمعش صوتهم وهما بيضحكوا ويهزروا حواليا لكن مع كدة بعد المكالمة مقدرتش أمشي وأسيبهم، وفي نفس الوقت مش قادر أتبسط معاهم، لأن مرض الإدمان مش مقتصر بس على المخدرات وإنما الإنسان يعتبر مدمن لأي سلوك غلط عارف كويس أنه بيضره ونفسه يبطله بس مش قادر، فكل ما يحاول يبطلها يظهر عليه أعراض أنسحاب نفسية زي اللي بتيجي لمدمن المخدرات لما يحاول يبطلها؛ قال إبن القيم رحمه الله:‬‬‬

‎”إن المعاصي تزرع أمثالها ويولد بعضها بعضاً حتى يعز على العبد مفارقتها والخروج منها، حتى تصير هيئات راسخة وصفات لازمة وملكات ثابتة، ولو عطل المجرم المعصية وأقبل على الطاعة لضاقت عليه نفسه، وضاق صدره حتى يعاودها، حتى إن كثيراً من الفسَّاق ليواقع المعصية من غير لذة يجدها ولا داعية إليها إلا لما يجده من الألم بمفارقتها.”‬‬‬

‎كريم: last round‬‬‬

‎ياسمين: eff ياربي أنجزوا‬‬‬

‎سارة: عمرو هتيجي معايا نتمشى بعد ما تخلصوا، ok؟‬‬‬

‎كريم: أنتي عايزة منه إيه؟‬‬

‎ياسمين: she’s having a heartbreak عشان صاحبها سابها‬‬‬

‎كريم: aha..‬‬‬

 ‎ياسمين: so she wants to talk with Amr about it‬‬

كريم: معلش يا سارة، إن شاء الله تصاحبي اللي أحسن منه

الحقيقة أنا حاسس أني شخص مدمن للمعاصي.. عارف أن المعاصي غلط ولكني بعملها مرة ورا مرة ومش قادر أبطلها. فرق كبير بين أن الواحد يبقى جاهل ويعمل حاجة غلط وهو مش عارف أنها غلط وبين أنه يبقى عارف أن حاجة غلط ورغم كدة بيعملها.. أنا شايف أني محتاج أطبق برنامج الTwelve Steps لعلاج الإدمان على نفسي، وأول خطوة لكدة هيا مقاطعة صحابي كلهم لمدة سنة..

‎كريم: King!‬‬‬

‎مهاب: أنت كفتجي يابني‬‬‬

‎ياسمين: ewff، أخيراً، يلا نلعب crazy 8‬‬‬

‎سارة: يلا يا عمرو تعالى‬ نتمشى، عايزة أتكلم معاك..‬‬

‎أنا: معلش يا سارة لازم أمشي عشان مسافر بكرة‬‬‬

‎ياسمين: really؟ ليه؟‬‬‬

‎أنا: عندنا في تالتة أسنان بيبقى فيه امتحانات في سبتمبر، عايز ألحق أذاكر

‎مهاب: يا عم مانتا قلت أنك جبت الكتب معاك هنا

‎أنا: أه بس مش عارف أركز خالص‬‬‬

‎كريم: طب أقعد شوية لسة بدري‬‬‬

‎أنا: لا معلش يا كريم عشان لسة هلم حاجتي وأنام شوية‬‬‬

‎سارة: عمرو أنت بتهرج؟‬‬‬

‎أنا: معلش يا سارة، نتكلم موبايل، ok؟‬‬‬

‎خرجت من الفيلا ركبت العربية ومشيت‬ وأنا بسمع أغنية Danser sur la lune:‬‬

S’évader un instant‬‬‬

Du souffle des tourments‬‬‬

Retrouver le sourire‬‬‬

Le parfum des plaisirs‬‬‬

Je connais ce chemin‬‬‬

روّحت الشاليه ملقتش حد، شغلت نور الجنينة، فرشت المصلية تحت شجرة البوتسوانا، وصليت ودعيت على هدير الماء وريحة شجرة ثرو الليمون، ونمت تحت الأضواء البرتقالية ومن فوقي القمر، زاهداً فيما سيأتي، ناسياً ما قد مضى.

صحيت على صوت بابا وماما وأختي راجعين الشاليه مع أذان الفجر، آتوضيت ورحت صليت في المسجد، وبعد الصلاة رحت أجيب pizza. على ما أستلمت البيتزا كان الشمس طلعت، رجعت الشاليه لميت حاجتي وقعدت آكل البيتزا في الterrace وأنا بتفرج على cartoon network و nickelodeon، حوليا أوراق الbougainvillea وعصافير وعن يميني خيوط شمس اليوم الجديد.

جت الساعة ٨ فصحّيت أخويا خليته يوصلني محطة الsuperjet، قطعت التذكرة وقعدت أستنيت الbus. وصل الsuperjet فسلمت على أخويا وركبته وقعدت جنب الشباك قفلت الستارة ونمت..

من اليوم دا مبقتش أقابل حد من صحابي لا ولاد ولا بنات ولا غيره. حتى صحابي بتوع الكلية بطلت أخرج معاهم وبقيت بشوفهم بس في الكلية..

Flashforward للنهاردة وأنا رحلتي في مارينا معدي من قدام الArcade Center..

يا ترى صحابي عاملين إيه؟ غالباً صحابي خلاص نسيوني، لكني لسة فاكرهم وبعديلهم، وبدعي لنفسي.‬.