الفصل رقم ١: بداية رواية “Charm الشيخ”
الفصل رقم ١: بداية رواية "Charm الشيخ"
الأربعاء، ٣٠ يناير، ٢٠١٩ – الساعة ٥:١٨ ص
فيلا التجمع الخامس
صحيت من النوم في نفس معاد صحياني كل يوم، لكن النهاردة مختلف، النهاردة هتبدأ رحلتي الجديدة. بعد الفجر مسافر مع أهلي شرم الشيخ. هنقضي أربعة أيام و٣ ليالي في Jaz Belvedere Resort.
قمت في سريري معتدلاً أستمع إلى أذان الفجر. مر أبي بالcorridor كعادته كل يوم في نفس الموعد وسلم عليا وسلمت عليه، بعدها قمت من سريري بأتجاه الtoilet، غسلت وشي وأسناني وأتوضيت وأتنشفت، ورجعت الأوضة.
أخدت الموبايل من على الكومودينو ورنيت على أخويا الكبير محمد الذي يسكن مع زوجته في الطابق الثاني بالفيلا، كان قد طلب مني أوقظه للسفر. بعدها قفلت الموبايل وحطيته على الكومودينو تاني.
لبست الsweatshirt بتاعي وخرجت من غرفتي باتجاه غرفة المكتب بتاع بابا حيث مصلى البيت. صليت الفجر مع بابا وسلمنا من الصلاة، ثم قال لي..
بابا: جاهز للسفر
أنا: إن شاء الله
بابا: جهزت شنطتك؟
أنا: يعني، مرتب الحاجة، هحطها بس في الشنطة.
بابا: طيب جميل. صحي ماما وسارة بقى عشان منتأخرش.
أنا: حاضر
رحت أوضة ماما وأوضة أختي صحيتهم وبعدين رحت المطبخ عملت شاي ورجعت أوضتي. أخدت الموبايل من على الكومودينو، فتحت ستائر النافذة وقعدت على الفوتيه الجلد اللي تحتها. فتحت الFacebook app وكتبت:
سافر تجد عوضاً عمَّن تفارقهُ .. وَانْصِبْ فَإنَّ لَذِيذَ الْعَيْشِ فِي النَّصَبِ
— traveling to Sharm el-Sheikh.
فات أكتر من خمس سنين على الheartbreak اللي حصلي بعد ما البنت اللي كنت بحبها اتجوزت، لكني لحد دلوقتي لسة مش قادر أحب بنت تانية. مهما أشوف بنت جميلة وفيها مميزات برضه مبحسش بأي مشاعر إنجذاب ليها. عمري وصل ٣٢ سنة وكل الشباب اللي حوليا اتجوزوا، اللي قدي واللي أصغر مني، وأنا لسة حتى مش لاقي بنت مناسبة.
بحاول أهرب من الفراغ العاطفي دا بحاجات كتير؛ زي السفر والأكل الصحي، وكتابة مذكراتي. كتبت قصص كتير عن الرحلات اللي بسافرها. أكيد السفر والكتابة والحياة الصحية بتساعد، لكنها لحد دلوقتي مش كفاية لأني أنسى البنت اللي كنت بحبها.
زي ما قلتلكم، أنا النهاردة مسافر شرم الشيخ مع أهلي، وكعادتي، ولحبي لكتابة مذكراتي منذ طفولتي، قررت أكتب رحلتي قصة يكون فيها خواطري التأملية والإيمانية خلال السفر، وعشان القصة تبقى ممتعة قررت أني أضيف ليها أحداث من خيالي، من الdaydreaming اللي بيجيلي في حياتي اليومية.
قفلت Facebook app وفتحت الNotes app وكتبت:
“Charm الشيخ”
“خواطر شاب انطوائي في رحلة إلى شرم الشيخ”
وبعدين قفلت الموبايل وأخدت الشاي وقمت رحت المطبخ أحضر الفطار.
Amr Ali Ibrahim
My name is Amr Ali Ibrahim. I'm an Egyptian dentist, digital marketer, and novelist from Cairo, born in 1986 and graduated from ASU Dental School in 2009. The novel "مارينا.. كان يا مكان" is considered my first published print book, and I have some other works that are not published as prints yet, however, I've published them on this website.
