الجمعة ١ فبراير، ٢٠١٩ – الساعة ٧:١٥ مساءاً

دخلت المطعم وبدأت أحط الأكل. كان العشاء oriental عشان النهاردة الجمعة، وكان ممتاز الحقيقة، أحلى عشاء في الأيام اللي قضيناها. كانوا عاملين خروف مشوي وفراخ محشية أرز، وورق عنب وكبيبة، وأرز بالكبد، وحاجات كتير تانية.. بحب الأكل المصري جداً وهو الcuisine المفضل بالنسبالي.

وأنا راجع من الbuffet التقيت بأميرة ووالدها ووالدتها. سألني والدها إن كان معي أحد فأجبت بالنفي، فدعوني لأجلس معهم على العشاء. طبعاً أنا اتفاجئت، لسة مقررتش هعمل إيه في مشاعري تجاه أميرة، لكني وافقت على دعوتهم وجلست معهم.

قعدنا وأكلنا واتكلمنا. باباها كلمني عن شغلي وعيادتي وحياتي بجانب الشغل. وكان الحوار كالتالي..

والد أميرة: وأنت يا عمرو شغال إيه دلوقتي؟

أنا: أنا طبيب أسنان

والد أميرة: جميل، مهنة ممتازة، وبتكسبوا كويس

ثوان ثم قال..

والد أميرة: عندك عيادة؟

أنا: أيوه، في الكوربة، مع عيادة بابا

والد أميرة: كويس، بالتوفيق يا عمرو

سكت ثوان ثم قال..

والد أميرة: مبتفكرش تفتح business جنب الشغل؟

أنا: يا ريت، لكن معنديش خبرة كبيرة. أنا شغال digital marketing جنب طب الأسنان، مع شركة في Canada.

والد أميرة: مع شركة كندية؟

أنا: أيوه، شغلها كويس جداً

والد أميرة: بيحاسبوك بالدولار أكيد.

أنا: ايوه، بالساعة. والشغل online من البيت. الشغل من البيت ليه مميزات كتير. شغل مربح جداً، أكتر من طب الأسنان كمان.

والد أميرة: ممتاز، دي حاجة كويسة جداً

ثوان ثم قال..

والد أميرة: أنا شغلي في البورصة أنت عارف

أنا: نعم

والد أميرة: جربت تستثمر في البورصة قبل كدة؟

أنا: لا، لكني استثمرت في الBitcoin والcryptocurrencies

والد أميرة: كويس، وعملت إيه؟

أنا (مبتسماً): خسرت..

ضحك وضحكت أميرة

والد أميرة: الStock Trading محتاج تكون متابع الأخبار كويس، ومتابع الmarket لفترة كويسة قبل ما تستثمر

أنا: صحيح، أنا اكتشفت كدة. لكن على كل حال دار الإفتاء المصرية حرمت الاستثمار في البيتكوين، فأنا مش متضايق اوي

والد أميرة: بتاخد برأي دار الإفتاء؟

أنا: نعم، تقريباً في كل المسائل الفقهية، لكن حضرتك عارف أن الفقه واسع والخلاف فيه مباح، فممكن أخد برأي مختلف في بعض المسائل

والد أميرة: أنت سلفي يا عمرو؟

أنا: أنا مش سلفي، لكن ناس كتير بتقولي كدة.. لكن على ما حال في تعريفات كتير للسلفية

والد أميرة: أنت إيه تعريفك ليها؟

أنا: فهم القرآن والسنة بمنهجية فهم سلف الأمة

والد أميرة: لكن دا مش بيقفل باب الاجتهاد؟

أنا: نهائي، إحنا ملزمين بالمنهجية في الفهم فقط، ومن حقنا نجتهد في أي مسألة

والد أميرة: طب خلي بالك توقع نفسك في مشاكل

أنا: حاضر يا uncle، شكراً

والد أميرة: أنا خلصت أكل، تحب نتمشى؟

أنا: نعم، يا ريت

والد أميرة: طيب يا ماما إحنا هنقوم نتمشى، خدوا راحتكم أنتم بقى

ومدام سهام: ماشي يا بابا، هنقابلكم أكيد

أخرج أونكل أيمن الموبايل وبدا أنه يقوم ببعض المعاملات الخاصة بالبورصة، ثم خرجنا من المطعم باتجاه الpool.

والد أميرة: وأنت يا عمرو، متجوزتش ليه لحد دلوقتي؟

أنا: آه.. دي قصة طويلة

والد أميرة: قولي، أنا موارايش حاجة

أنا: كان في بنت بحبها، كنت اتعرفت عليها في إجتماع مشروع دعوي أيام الثورة، كانت ذكية ومتعلمة وopen-minded جداً، ومتدينة اوي. عرفتها لمدة تلات سنين، كنا بنشتغل مع بعض على مشاريع دعوية online، وكانت dedicated جداً. لما أتأكدت أني بحبها قررت أني اتقدملها، أتكلمت معاها فقالتلي أنا خلاص اتخطبت..

والد أميرة: ياه، So bad..

أنا: صحيح..

سكت ثوان ثم قال..

والد أميرة: معلش، الجواز قسمة ونصيب.

أنا: أكيد

وسكتنا ثوان أخرى ثم قال..

والد أميرة: كانت جميلة؟

أنا: الحقيقة: معرفش. كانت منتقبة..

ضحك أنكل أيمن ضحكة عالية جداً فأبتسمت معه متذكراً ضحك أميرة على نفس الأمر

والد أميرة: معقولة ممكن التوافق الفكري يخلي واحد يحب واحدة ميعرفش شكلها؟
أنا: بالتأكيد، الحب ملوش حدود ولا قواعد

والد أميرة: صحيح، معاك حق

سكتنا ثوان ثم قال..

والد أميرة: لكن متقلقش، البنات الكويسة كتير، أكيد هتلاقي بنت تعجبك، يمكن أكتر منها، أنا عارف كلامي دا ممكن يكون مش مفهوم بالنسبالك، لكن مع الوقت هتفهمه

أنا: لأ، نهائي، أنا مقتنع بكدة.. لكن المشكلة في الوقت، أنا دلوقتي ٣٢ سنة يا uncle، عشان ألاقي بنت وأعرفها وفترة الخطوبة.. مش هتجوز قبل  ٣٥ سنة..

والد أميرة: ياه، ٣ سنين عشان تتجوز..

أنا: كتير؟

والد أميرة: ممم، كتير جداً بالنسبالي. أنت perfectionist على فكرة، ودا بيفسر سلفيتك

أنا: نعم، صحيح، INFJ.. حضرتك تعرف Typology؟ Myers Briggs Type Indicator؟

والد أميرة: أكيد.. أنا INTP

أنا: INTP, I think they make great fathers

والد أميرة: أها..

صمت لثوان أفكر في أميرة وكيف أن لها أب رائع زي أنكل أيمن..

والد أميرة: الINFJs مش كتير على فكرة

أنا: نعم، صحيح

والد أميرة: دا برضه بيفسر سلفيتك، وشغلك في الدعوة، الINFJs بيحبوا يكافحوا عشان مبادئهم

أنا: صحيح

والد أميرة: هل دا السبب أنكم بتلجؤوا للعنف، زي هتلر وزي بن لادن مثلاً؟

أنا: ممكن جداً

والد أميرة: عشان كدة قلتلك خلي بالك توقع نفسك في مشاكل

أنا: نعم، أنا أبعد ما يكون عن كدة

والد أميرة: كويس

وإحنا ماشيين ألتقينا أميرة ماشية لوحدها.

والد أميرة: أميرة

أميرة: أزيك يا papi

والد أميرة: أزيك يا حبيبتي، ماما فين

أميرة: أهي جاية ورايا

ثم ألتفت تجاهي وقال..

والد أميرة: طيب يا عمرو، أنا مبسوط جداً بالحوار معاك

أنا: شكراً يا أنكل، أنا أسعد

والد أميرة: أنت مسافر بكرة؟

أنا: أيوه، على الساعة ١٢ الظهر كدة

والد أميرة: طيب، سلملي على بابا كتير

أنا: يوصل إن شاء الله

والد أميرة: ماشي يا عمرو، مع السلامة

أنا: مع السلامة

أميرة: bye يا عمرو

أنا: مع السلامة يا أميرة

انصرفت أميرة ووالدها باتجاه الlobby وتأملتها وهي تمسك بيد والدها، رجل محترم ومثقف جداً، بالتأكيد أحسن تربيتها.

أخرجت الموبايل واتصلت بوالدتي أسألها عن مكانهم، فقالت لي أنهم في مطعم ريحانة يتناولون العشاء، فذهبت إليهم.

دخلت المطعم دورت على أهلي، لقيتهم، فسلمت عليهم وقعدت معهم.

ماما: عاملين النهاردة oriental food يا عمرو، جميل اوي

أنا: آه يا ماما جميل جداً

بابا: أتعشيت يا عمرو؟

أنا: أه، وبعدها قمت أتمشى مع بابا أميرة، بيسلم عليك عشان عرف أننا مسافرين بكرة

بابا: الله يسلمه، هو كلمني من دقيقة يسلم عليا، اتعشيت؟

أنا: آه، اتعشيت مع أميرة وأهلها

أتفق أهلي على أننا نروح Soho Square. خلصوا أكل وقمنا باتجاه الlobby أخدنا العربيات من الparking الhotel ورحنا على Soho Square القريب من الresort.

وصلنا Soho Square، كان في ناس كتير وزحمة عن خليج نعمة. إضاءات وكافيهات كتير على اليمين والشمال وسياح كتير ماشيين. مشينا نتجول نتفرج على محلات الملابس. وإحنا ماشيين عدينا على الIce Skating ،Arena فقلت لبابا وماما هدخل أتفرج وأقابلكم بعد شوية.

دخلت أتفرج على الteenagers وهما بيلعبوا. آخر مرة لعبت skating كنت في سنهم. شكلهم حلو جداً ومبسوطين، وأنا سعيد أنهم بيعملوا ترفيه حلال. تأملتهم لنصف ساعة بدون ملل، ثم أشتقت لذكريات المراهقة فدخلت لألعب معهم وأنا أُفكرإذا ما كنت أمر بمرحلة المراهقة المتأخرة او أزمة منتصف العمر، وإذا ما كان لقائي بأميرة هو السبب.

خلصت ساعة الskating اللي حجزتها وخرجت غيرت الboots وقلعت الpads ودخلت أتفرج على إبن أخويا وهو بيلعب في الkids club اللي جنب الskating. فرح جداً بقدومي واستقبلني استقبال حار أشعرني بمشاعر الأبوة. هل في يوم هبقى أب زي أخويا؟ ولا هيعدي العمر ويفوتني القطر؟ فات أكتر من خمس سنين على heartbreak البنت اللي كنت بحبها، وعمري الآن بقى ٣٢ سنة. أغلب صحابي اتجوزوا وكل ولاد العيلة وأنا لسة مخطبتش حتى. كل ما أقابل حد يسألني أشوفلك عروسة؟ لكني الآن ولأول مرة بعد الheartbreak منجذب لبنت. لكن إيه حقيقة الانجذاب دا؟ هل دا من علامات المراهقة المتأخرة وأزمة منتصف العمر وإعجابي بأميرة مجرد crush؟ ولا إعجابي دا مبني على أساس قوي لطول معرفتي بأميرة من صغري ولأنها فعلاً مميزة؟ حديثي اليوم مع والدها خلاني أُعجب بيها أكتر. إن كان هو مثقف وopen-minded ومتفاهم كدة يبقى هيا أكيد زيه. زادت حيرتي، هل أصارح أميرة بأعجابي كما قالت لي أختي؟ ولا بمجرد ما أسيب شرم وأرجع القاهرة الcrush دي هتعدي؟ مش عارف، عشان كدة محتار..

خلص إبن أخويا لعب فخرجنا رحنا لأهلنا في الshopping area، اتمشينا شوية وبعدين روحنا.

معرفتش أنام من كتر التفكير فقعدت أقرأ قرآن وأصلي قيام ليل، وفي الآخر صليت ركعتين استخارة أكلم أميرة في الموضوع ولا لأ. أذن الفجر فصحيت بابا وصليت معاه، وبعدين نزلت أقعد على البحر أتفرج على شروق الشمس، وبعد الشروق طلعت الأوضة ونمت.